Amit & Kajal

Chapter 1

"Main Amit Hoon… Aur Ye Meri Kahani Hai."

Main Amit hoon. Ek din social media par mujhe ek ladki mili. Uska naam tha —

Kajal

Pehle normal hi baat shuru hui. "Hi… Hello…" se start hua. Phir dheere dheere daily baat hone lagi. Phir aadat si ban gayi.

Subah uthte hi uska message dekhna… Raat ko sone se pehle usse baat karna…

Woh Jammu mein… Kajal Dibrugarh mein — par dil ek saath.

Ek din usne kaha —

"Amit, agar serious ho… toh milne aao."

Mera dil tez dhadakne laga. Itni door? Main kabhi itna door nahi gaya tha. Par pata nahi kyun… maine decide kar liya.

"Milte hain."

Chapter 2

Safar Jo Kabhi Bhool Nahi Sakta

Maine ticket check ki… par confirm ticket nahi mila. Mere paas option tha — ya toh plan cancel kar du… Ya risk le lu.

Aur maine risk le liya.

Main general dabbe mein chadh gaya. 2 din ka safar tha. Na seat mili… na sone ki jagah.

"Kya wo mujhe pasand karegi?"

"Ya agar usse main pasand nahi aaya toh?"

Aur phir… Train rukti hai. Announcement hota hai —

"Next station… Dibrugarh."

"Ab asli kahani shuru hone wali hai…"

Chapter 3

Woh 11 Baje Ka Intezaar

Maine usko message kiya —

"Main pahunch gaya hoon."

"Dekho Kajal… agar tum mujhe kal 11 baje nahi mili… toh phir main tumse nahi milunga."

Usne turant reply kiya —

"Theek hai. Main aaungi. Tum bas 11 baje wahan rehna."

Agli subah main 10:30 baje hi Hanuman Mandir pahunch gaya. Mere liye har minute ek ghante jaisa lag raha tha.

Tabhi mujhe mehsoos hua koi mujhe dekh raha hai. Woh mere peeche se aayi… dheere se.

"Amit…"

Main palta. Aur us pal ko main kabhi nahi bhool sakta.

Main bas itna hi keh paya —

"Tum aa gayi…"

Woh muskura ke boli —

"Maine kaha tha na… aaungi."

Chapter 4

Nadi Ke Kinare

Pehle 2–3 minute tak hum dono chup the. Online toh hum nonstop baat karte the… par aaj saamne baith kar shabd hi nahi mil rahe the.

"Online toh tum itna bolti ho… aaj kya ho gaya?"

"Real mein milne ka feel alag hota hai."

Park ke baad hum nadi ke kinare jaake baith gaye. Halka sa hawa chal raha tha. Pani ki awaaz… aur beech beech mein uski halki si hasi.

"Amit… sach sach batao… kya main tumhe pasand hoon?"

"Haan. Bohot."

Us pal mujhe laga mera safar, meri takleef, general coach mein khade rehna — sab worth tha.

Us din humne bas ek cheez decide ki —

Jo bhi hoga… sach hoga.

Chapter 5

Station Par Alvida

Agla din aa gaya tha. Meri return train thi. Main platform par khada tha… ticket haath mein… par dil kahin aur hi tha. Phir achanak phone vibrate hua.

"Kahan ho?"

"Station par."

"Ruko."

10 minute baad… bheed ke beech mujhe woh dikhi. Woh daudte hue aa rahi thi!

Woh sirf baaton mein serious nahi thi. Woh sach mein mere liye risk le rahi thi.

"Amit… tum jaane ke baad mujhe bhool toh nahi jaoge?"

"Main itni door sirf milne ke liye aaya hoon… bhoolne ke liye nahi."

"Distance bohot zyada hai… mujhe darr lagta hai."

Maine uska haath pakad kar kaha —

"Distance sirf map mein hota hai… agar dil mein ho toh phir problem hai."

Train dheere dheere chalne lagi. Main door se usko chhota hota hua dekh raha tha.

"Call karna pahunch ke."

Us din mujhe samajh aaya — Pyaar sirf milne ka naam nahi… Kabhi kabhi door rehkar bhi nibhana padta hai.

Chapter 6

Phir Se Wahi Ticket… Phir Se Wahi Dhadkan

Maine ticket book kiya. Phir se. Iss baar dil mein darr nahi tha — sirf ek hi khayal tha…

"Ek baar kaafi nahi tha."

Pehli baar gaya tha — anjaan tha. Iss baar gaya — apna tha.

Pehli baar 3000 km gaya — darr ke saath. Doosri baar gaya — yakeen ke saath. Ek woh safar tha jo anjaan tha… Ek yeh safar tha jo apna tha.

"Teen hazaar kilometer… jab tak tum ho, main chalta rahunga."